Húsdrápa.
Úlfr Uggason.

1.
Hjaldrgegnis ték Hildar
herreifum Áleifi,
hann vil ek at gjöf Grimnis,
geðfjarðar lá, kveðja.

2.
Ráðgegninn bregðr ragna
rein at Singasteini
frægr við firna slœgjan
Fárbauta mög vári;
móðöflugr ræðr mœðra
mögr hafnýra fögru,
kynni ek, áðr ok einnar
átta, mærðar þáttum.

3.
Þjokkvaxinn kvezk þykkja
þiklingr firinmikla
hafra njóts at höfgum
hætting megindrætti.

4.
Innmáni skein ennis
öndótts vinar banda;
áss skaut œgigeislum
orðsæll á men storðar.

5.
En stirðþinull starði
storðar leggs fyr borði
fróns á folka reyni
fránleitr ok blés eitri.

6.
Fullöflugr lét fellir
fjall-Gauts hnefa skjalla
[ramt mein var þat] reyni
reyrar leggs við eyra;
Víðgymnir laust Vimrar
vað er af fránum naðri
hlusta grunn við hrönnum.
Hlaut innan svá minnum.

7.
Ríðr á börg til borgar
böðfróðr sonar Óðins
Freyr ok folkum stýrir
fyrstr inum gulli byrsta.

8.
Ríðr at vilgi víðu
víðfrægr, en mér líða,
Hroptatýr, of hvápta
hróðrmál, sonar báli.

9.
Þar hygg sigrunni svinnum
sylgs valkyrjur fylgja
heilags tafns ok hrafna.
Hraut innan svá minnum.

10.
Kostigr ríðr at kesti
kynfróðs þeim er goð hlóðu
Hrafnfreistaðar, hesti
Heimdallr, at mög fallinn.

11.
Fullöflug lét fjalla
fram haf-Sleipni þramma
Hildr, en Hropts of gildar
hjalmelda mar feldu.

12.
Þar kemr á, en æri
endr bark mærð af hendi,
[ofra ek svá] til sævar,
sverðregns [lofi þegna].