Oddrúnargrátr

Oddrúnargrátr.
Heiþrecr het konvngr, dottir hans het Borgny. Vilmvndr het sa, er var friþill hennar. Hon matti eigi foða born, aþr til com Oddrvn Atla systir; hon hafþi verit vnnvsta Gvnnars Givcasonar. Vm þessa sa/go er her qveþit:
1 5	Heyrþa ec segia i sa/gom fornom, hve mer vm kom til Mornalanz; engi matti fyr iorþ ofan Heiþrecs dottvr hialpir vinna.
2 5	Þat fra Oddrvn Atla systir, at sv mer hafþi miclar sóttir; brá hon af stalli stiornbitloþom oc a svartan sa/þvl of lagdi.
3 5 9	Let hon mar fara moldueg slettan, vnz at hári com ha/ll standandi; svipti hon sa/þli af svongom ió, oc hon inn vm gecc endlangan sal, oc hon þat orda allz fyrst vm qvaþ:
4 5	«Hvat er fregst a foldo, eþa hvat er hléz Hvnalanz?» Ambott qvaþ: «Her liggr Borgny of borin verkiom, vina þin, Oddrvn! vittv, ef þv hialpir.»
5	Oddrvn qvaþ: «Hverr hefir vísir vamms vm leitað, hvi ero Borgnyiar braþar sóttir?»
6 5	Ambott qvaþ: «Vilmvndr heitir vinr ha/cstalda, hann varþi mey varmri bleio fimm vetr alla, sva hon sinn fa/dvr leyndi.»
7 5	Þer hycc melto þvigit fleira, gecc mild fyr kne meyio at sitia; rict gól Oddrvn, rammt gól Oddrvn bitra galdra at Borgnyio.
8 5	Knatti mer oc ma/gr moldveg sporna, born þa/ in bliþo viþ bana Ha/gna; þat nam at mela mer fiorsivka, sva at hon ecci qvaþ orþ iþ fyrra:
9 5	«Sva hialpi þer hollar vettir, Frigg oc Freyia oc fleiri goð, sem þv feldir mer fár af hondom!»
10 5 9	Oddrvn qvaþ: «Hnecaþ ec af þvi til hialpar þer, at þv verir þess [verþ] aldregi; het ec oc efndac, er ec hinig melta, at ec hvivetna hialpa scyldac, þa er a/þlingar arfi scipto.»
11 5	Borgny qvaþ: Or ertv, Oddrvn! oc ørvita, er þv mer af fári flest orþ of qvaþ; enn ec fylgdac þer a fiorgynio, sem viþ broþrom tveim of bornar verim.»
12 5	Oddrvn qvaþ: «Man ec, hvat þv meltir enn vm aptan, þa er ec Gvnnari gerþag drecco; slics domi qvaðattv siþan mundo meyio verþa nema mer einni.»
13	Þa nam at setiaz sorgmóð kona, at telia ba/l af trega stórvm:
14 5	«Var ec vp alin i iofra sal — flestr fagnaþi — at fira ráþi; vnþa ec aldri oc eign fa/þvr fimm vetr eína, sva at minn faþir lifði.
15 5	Þat nam at mela mal iþ efsta sia moþr konvngr, adr hann sylti: mic baþ hann geða gulli ra/þo oc svþr gefa syni Grimildar.
16 5	Enn hann Brynhildi bað hialm geta, hana qvað hann oscmey verþa scyldo; qvaþa hann ina oþræ alna myndo mey i heimi, nema miotvðr spillti.
17 5	Brynhildr i bvri borða racþi, hafþi hon lyði oc lond vm sic; iorþ dvsaþi oc vphiminn, þa er bani Fafniss borg vm þatti.
18 5	Þa var vig uegit volsco sverþi oc borg brotin, sv er Brynhildr atti; vara langt af þvi, heldr válitið, nnz þer velar vissi allar.
19 5	Þess let hon harðar hefndir verþa, sva at ver a/ll hofom ernar rá/nir; þat mvn a ha/lða hvert land fara, er hon let sveltaz at Sigvrþi.
20	Enn ec Gvnnari gatc at vnna ba/ga deili, sem Brynhildr scyldi.
21 5	Bvðo þeir árla ba/ga ra/þa oc broþr minom betr osmár; ba/þ hann enn við mer bv fimtán, hliþfarm Grana, ef hann hafa vildi.
22 5	Enn Atli qvaz eigi vilia mvnd aldregi at megi Givca; þeygi viþ máttom viþ mvnom vinna, nema ec helt ha/fði viþ hringbrota.
23 5	Melto margir minir niðiar, qvoþvz ocr hafa orþit bøþi; enn mic Atli qvaþ eigi myndo lyþi raþa ne la/st gora.
24	Enn slics scyli synia aldri maþr fyr annan, þar er mvnvþ deilir.
25 5	Sendi Atli áro sina vm myrcvan viþ mín at freista; oc þeir qvomo þar, er þeir coma ne scyldoþ, þa er breiddo viþ bleio eina.
26 5	Bvðo viþ þegnom ba/ga ra/þa, at þeir eigi til Atla segði; enn þeir hvatliga heim scvndoðo oc óliga Atla sa/gðo.
27	Enn þeir Gvðrvno gorla leyndo þvi, at hon heldr vita halfo scyldi.
28 5	Hlymr var at heyra hofgvllinna, þa er i garð riþo Givca arfar; þeir or Ha/gna hiarto scaro, enn i ormgarð annan la/gþo.
29 5 9	Var ec enn farin eino sinni til Geirmvndar gorva dryckio; nam horscr konvngr ha/rpo sveigia, þviat hann hvgdi mic til hialpar ser kynricr konvngr of koma mvndo.
30 5	Nam ec at heyra or Hlésseyio, hve þar af striþom strengir gvllo; baþ ec ambáttir bvnar verþa, vilda ec fylcis fiorvi biarga.
31	Létom fliota far svnd yfir, vnz ec alla sac Atla garþa.
32 5	Þa com in arma ut scevandi moþir Atla, hon scyli morna! oc Gvnnari gróf til hiarta, sva at ec mattigac morom biarga.
33 5	Opt vndromc þat, hvi ec eptir mác, linnvengiss bil! lifi halda; er ec ognhvotom vnna þottvmz sverþa deili, sem sialfri mer.
34 5	Sattv oc hlyddir, meþan ec sagþac þer morg ill vm sca/p min oc þeirra; maþr hverr lifir at mvnom sinom.» Nv er vm genginn gratr Oddrvnar.