Helgakviða Hundingsbana hin fyrri
1 5	Ár var alda þat er arar gvllo, hnigo heilog votn af himinfiollom; þa hafþi Helga inn hvgom stora Borghildr borit i Bralvndi.
2 5	Nott varþ i bo, nornir qvomo, þer er a/þlingi aldr vm scópo; þann baþo fylci frogstan verþa oc bvþlvnga beztan þiccia.
3 5	Snero þer af afli a/rla/gþátto, þa er borgir bra/t i Brálvndi; þer vm greiddo gvllin simo oc vnd manasal miþian festo.
4 5	Þer a/str oc vestr enda fálo, þar átti lofðvngr land a milli; brá nipt Nera a norþrvega einni festi, ey baþ hon halda.
5 5	Eitt var at angri Ylfinga niþ oc þeirre meyio er mvnvþ foddi; hrafn qvaþ at hrafni — sat a hám meíþi andvanr áto —: «Ec veit noccoþ.
6 5	Stendr i brynio bvrr Sigmvndar dogrs eins gamall, nv er dagr kominn; hversir a/go sem hildingar, sa er varga vinr, viþ scolom teitir.»
7 5	Drótt þotti sa da/glingr vera, qvado meþ gvmnom [goð-]ár kominn; sialfr gecc visi or vígþrimo vngom fora itrlá/c grami.
8 5	Gaf hann Helga nafn oc Hringstaði, Sólfioll, Snefioll oc Sigarsvollo, Hringsta/ð, Hatvn oc Himinvanga, bloþorm bvinn broþr Sinfiotla.
9 5	Þa nam at vaxa fyr vina briosti almr itrborinn ynþiss lióma; hann galt oc gaf gvll verþvngo, sparþi eigi hilmir hodd bloþrekinn.
10 5	Scamt let visi vigs at biþa, þa er fylkir var fimtán vetra, oc hann harðan let Hvnding veginn, þann er lengi reþ la/ndom oc þegnom.
11 5	Qva/ddo siþan Sigmvndar bvr a/þs oc hringa Hvndings synir; þviat þeir atto iofri at gialda fiárnám micit oc fa/þvr da/þa.
12 5	Letaþ bvðlvngr bótir vppi ne niþia in heldr nefgiold fá; ván qvaþ hann mvndo veþrs ens micla grára geira oc gremi Oþins.
13 5	Fara hildingar hiorstefno til þeirrar er la/gdo at Logafiollom; sleit Froþa friþ fianda a milli, fara Viþriss grey valgiorn vm ey.
14 5	Settiz visi, þa er vegit hafði Álf oc Eyiolf, vnd arasteini, Hiorvarð oc Havarþ Hvndings sono; farit hafði hann allri et geirmimis.
15 5	Þa brá lioma af Logafiollom, enn af þeim liomom leiptrir qvomo; þa var vnd hialmom a Himinvanga, brynior váro þeirra bloþi stocnar, enn af geirom geislar stoþo.
16 5	Fra arliga or vlfiþi da/glingr at þvi disir svðronar, ef þer vildi heim meþ hildingom þa nótt fara; þrymr var alma.
17 5	Enn af hesti Ha/gna dottir — liddi randa rym — resi sagði: «Hygg ec, at ver eigim aþrar syslor enn meþ bá/gbrota biór at drecca.
18 5	Hefir minn faþir meyio sinni grimmom heitit Granmars syni; enn ec hefi, Helgi! Ha/ðbrodd qveþinn konvng óneisan sem cattar son.
19 3	Þó komr fylcir fára nátta, nema þv hanom visir valstefno til eþa mey nemir frá mildingi.»
20	Helgi qvaþ: «Vggi eigi þv Isvngs bana! fyrr mvn dólga dynr, nema ec da/þr siác.»
21 5	Sendi áro allvaldr þaðan of land oc vm log leidar at biþia, iþgnogan ognar lioma bra/gnom bioþa oc bvrom þeirra.
22 5	«Biþit sciotliga til scipa ganga oc or Brandeyio bvna verþa!» Þaðan beið þengill, vnz þingat qvomo halir hvndmargir or Hedinseyio.
23 5	Oc þar af strondom or Stafnsnesi beit her vt scriþv oc bvin gvlli; spvrþi Helgi Hiorleif at þvi: «Hefir þv kannaþa koni oneisa?»
24 5	Enn vngr konvngr oþrom sagði, seint qvaþ at telia af Tra/noeyri langha/fðvþ scip vnd líþondom, þa/ er i Orvasvnd vtan foro.
25 3	«Tolf hvndrvð tryggra manna; þo er i Hátvnom halfo fleíra viglid konvngs, ván erom rómo.»
26 5	Sva brá styrir stafntioldom af, at mildinga mengi vacþi, oc da/glingar dagsbrvn siá, oc siclingar snero vp viþ tre vefnistingom a Varinsfirði.
27 5	Varð ára ymr oc iarna glymr, brast ra/nd við ra/nd, rero vikingar; eisandi gecc vnd a/þlingom lofdvngs floti la/ndom fiarri.
28 5	Sva var at heýra, er saman qvomo Kolgo systir oc kilir langir, sem biorg eþa brim brotna mvndi.
29 5	Draga baþ Helgi há segl ofarr, varþat hra/nnom ha/fn þingloga, þa er ógorlig Egis dottir stagstiornma/rom steypa vildi.
30 5	Enn þeím sialfom Sigrvn ofan folcdiorf vm barg oc fari þeirra; snoriz ramliga Rán or hendi gialfrdýr konvngs at Gnipalvndi.
31 5	Sat þar vm aptan i Vnavagom, fla/st fagrbvin flióta knátto; enn þeir sialfir fra Svarinsha/gi meþ hermþar hvg her ka/nnoþo.
32 3	Fra goðborinn Gvþmvndr at þvi: «Hverr er landreki sa er liþi styrir oc hann feicnaliþ forir at lande?»
33 5	Sinfiotli qvaþ — sla/ng vp viþ ra ra/þom scildi, ra/nd var or gvlli; þar var svndvorþr sa er svara kvnni oc viþ a/þlinga orðom scipta —:
34 5	«Segðv þat i aptan, er svínom gefr oc tícr yðrar teygir at solli, at se Ylfingar a/stan comnir gvnnargiarnir † fra Gnipalvndi.
35 5	Þar mvn Ha/ðbroddr Helga finna fla/gtra/þan gram i flota miþiom, sa er opt hefir orno sadda, meþan þv a kvernom kystir þýiar.»
36 5 9	Gvþmvndr qvaþ: «Fátt manttv, fylcir! fornra spialla, er þv a/þlingom osa/nno bregdr; þv hefir etnar vlfa crásir oc broþr þinom at bana ordit, opt sár sogin meþ sva/lom mvnni, hefr i hreysi hvarleiþr scriþit.»
37 5	Sinfiotli qvaþ: «Þv vart va/lva i Varinseyio, scollvís kona! bartv scra/c saman; qvaztv engi mann eiga vilia, segg bryniaþan nema Sinfiotla.
38 5	Þv vart, en sceþa! scass valkyria, a/tvl, amátlig at Alfa/dvr; mvndo einheriar allir beriaz, svevis kona! vm sakar þinar.
39	Nio atto viþ a nesi Sagv vlfa alna, ec var einn faþir þeirra.»
40 5	Gvþmvndr qvaþ: «Fadir varattv fenrisvlfa ollom ellri, sva at ec mvna, sizt þic geldo fyr Gnipalvndi þvrsameyiar a Þorsnesi.
41 5 9	Stivpr vartv Siggeirs, látt vnd sta/þom heima, varglioþom vanr a viþom vti; komo þer ogogn oll at hendi, þa er broþr þinom briost ra/faþir; gorþir þic fregian af firinvercom.»
42 5	Sinfiotli qvaþ: «Þv vart brvþr Grana a Bravelli, gvllbitlvþ vart gor til rasar; hafda ec þer moþri mart sceiþ riþit, svangri vnd sa/þli, simvl! forbergis.»
43 5	Gvþmvndr qvaþ: «Sveinn þottir þv siþla/ss vera, þa er þv Gvllnis geitr molcaþir, enn i annat sinn imþar dottir ta/ttrvghypia; vill þv ta/lo lengri?»
44 5	Sinfiotli qvaþ: «Fyrr vilda ec at Frecasteini hrafna seþia a hreom þinom, enn ticr yþrar teygia at solli eþa gefa ga/ltom; deili gra/m viþ þic!»
45 5	Helgi qvaþ: «Veri ycr, Sinfiotli! Semra myclo gvnni at heýia oc glaþa orno, en se onytom orþom at bregðaz, þot hringbrotar heiptir deili.
46 5	Þicciat mer godir Granmars synir, þo dvgir siklingom satt at mela; þeir hafa marcat a Móinsheimom at hvg hafa hiorom at bregda.»
47 5	Þeir af ríci renna leto Svipvð oc Svegioþ Solheima til dala da/ggótta, da/cqvar hliþir; scalf Mistar marr, hvar megir foro.
48 5 9	Metto þeir tiggia i tvnhliþi, sa/gdo striþliga stilli qvomo; vti stoþ Ha/þbroddr hialmi faldinn, hvgði hann ioreiþ ettar sinnar: «Hvi er hermþar litr a Hniflvngom?»
49 5	Gvþmvndr qvaþ: «Snvaz her at sandi snefgir kiólar, racca hirtir oc rár langar, scildir margir, scafnar árar, ga/fvct liþ gylfa, glaþir Ylfingar.
50 5 9	Ganga fimtán folc vp a land, þo er i sogn vt siau þvsvndir; liggia her i grindom fyr Gnipalvndi brimdýr blásvort oc bvin gvlli; þar er miclo mest mengi þeirra, mvna nv Helgi hiorþing dvala.»
51 7	Ha/þbroddr qvaþ: «Renni ra/cn bitlvþ til reginþinga, en Sporvitnir at Sparinsheiði, Melnir oc Mylnir til Myrcviþar; latiþ engi mann eptir sitia þeirra er benlogom bregða kvnni!
52 5	Bioþi þer Ha/gna oc Hrings sonom, Atla oc Yngva, Alf enom gamla! þeiro giarnir gvnni at heyia; latom Volsvnga viþrnám fá!»
53 5 9	Svipr einn var þat, er saman qvomo fa/lvir oddar at Frecasteíni; ey var Helgi Hvndings bani fyrstr i folci, þar er firar ba/rþvz, ostr a ímo, alltra/þr flvgar; sa hafdi hilmir hart móþakarn.
54 5	Como þar or himni hialmvitr ofan — óx geira gnýr — þer er grami hlifþo; þa qvaþ þat Sigrvn, sárvitr flvga — át hálo scer af hvgins barri —:
55 5	«Heill scaltv, visi! virþa nióta, átstafr Yngva! oc vna lífi, er þv felt hefir inn flvgartra/da iofvr þann er olli egis davða.
56 5	Oc þer, bvþlvngr! samir beþi vel ra/ðir ba/gar oc in rikia mer; heill scaltv, bvþlvngr! beþi nióta Ha/gna dottvr oc Hringstaþa, sigrs oc landa; þa er socn lokit.