LokasennaFra Egi oc godom

Lokasenna Fra Egi oc godom
Egir, er a/dro nafni het Gýmir, hann hafði bvit asom a/l, þa er hann hafði fengit ketil inn micla, sem nv er sagt. Til þeirrar veizlo com Oþinn oc Frigg kona hans. Þorr com eigi, þviat hann var i a/strvegi. Sif var þar kona Þórs. Bragi oc Iþvnn kona hans. Tyr var þar, hann var einhendr: Fenrisvlfr sleit ha/nd af hanom, þa er hann var bvndinn. Þar var Niorþr oc kona hans Scaði. Freyr oc Freýia. Viðarr son Oþins. Loki var þar. Oc þionvstomenn Freys Beyggvir oc Beyla. Mart var þar asa oc alfa.
Egir atti tva þionvstomenn: Fimafengr oc Elder. Þar var lysigvll haft fyr eldz liós; sialft barsc þar a/l; þar var griþastadr micill. Menn lofoðo mioc, hverso goðir þionvstomenn Egis voro. Loki matti eigi heyra þat oc drap hann Fimafeng. Þa scóco esir scioldo sina oc opþo at Loca oc elto hann bra/t til scogar, enn þeir foro at drecca. Loci hvarf aptr oc hitti vti Eldi; Loci qvaddi hann:
1 4	Segðv þat, Eldir! sva at þv einvgi feti gangir framarr: hvat her inni hafa at a/lmálom sigtifa synir.»
2 4	Eldir qvaþ: «Of vapn sín doma oc vm vigrisni sina sigtifa synir; asa oc alfa, er her inni ero, mangi er þer i orði vinr.»
3 4	Loci qvaþ: «Inn scal ganga Egiss hallir i a þat svmbl at siá; ioll oc áfo fori ec asa sonom oc blend ec þeim sva meini mioþ.»
4 4	Eldir qvaþ: «Veiztv, ef þv inn gengr Egis hallir í á þat svmbl at sia, hropi oc rógi ef þv eýss a holl regin, a þer mvno þa/ þerra þat.»
5 4	Loci qvaþ: «Veiztv þat, Eldir! ef við einir scolom sáryrdom sacaz, a/þigr verþa mvn ec i andsvorom, ef þv melir til mart.»
Siþan gecc Loci inn i ha/llina. Enn er þeir sa, er fyr varo, hverr inn var kominn, þa/gnoþo þeir allir.
6 4	Loci qvaþ: «Þyrstr ec com þessar hallar til Loptr vm langan veg, aso at biþia, at mer einn gefi meran drycc miaðar.
7 4	Hvi þegit er sva, þrvngin goð! at þer mela ne megoð? sessa oc staþi velið mer svmbli at, eda heitiþ mic heþan!»
8 4	Bragi qvaþ: «Sessa oc staði velia þer svmbli at esir aldregi; þviat esir vito, hveim þeir alda scolo gambansvmbl vm geta.»
9 4	Loci qvaþ: «Mantv þat, Oþinn! er við i ardaga blendom bloþi saman: a/lvi bergia leztv eigi mvndo, nema ocr veri baþom borit?»
10 4	Oþinn qvaþ: «Ristv þa, Viþarr! oc lat vlfs fa/þvr sitia svmbli at, siþr oss Loci qveþi lastasta/fom Egis ha/llo í.»
Þa stoþ Viþarr vp oc skencti Loca; enn aþr hann drycci, qvaddi hann asona:
11 4	«Heilir esir, heilar asynior oc a/ll ginnheilog goð! nema sa einn áss, er innar sitr, Bragi, becciom a.»
12 4	Bragi qvaþ: «Mar oc meki gef ec þer mins fiar oc botir þer sva ba/gi Bragi: siþr þv asom a/fvnd vm gialdir; gremþv eigi goð at þer!»
13 4	Loci qvaþ: «Iós oc armba/ga mvndv e vera beggia vanr, Bragi! asa oc alfa, er her inni ero, þv ert viþ víg varastr oc sciarrastr viþ scot.»
14 4	Bragi qvaþ: «Veit ec, ef fyr vtan verac, sva sem fyr innan emc, Egis ha/ll vm kominn: ha/fvþ þitt bera ec i hendi mer; litt [qveþ] ec þer þat fyr lygi.»
15 4	Loci qvaþ: «Sniallr ertv i sessi, scalatv sva gora, Bragi beccscra/tvþr! vega þv gacc, ef þv reiþr sér! hyggz vetr hvatr fyrir.»
16 4	Iþvnn qvaþ: «Biþ ec, Bragi! barna sifiar dvga oc allra oscmaga, at þv Loca qveþira lastasta/fom Egis ha/llo í.»
17 4	Loci qvaþ: «Þegi þv, Iþvnn! þic qveþ ec allra qvenna vergiarnasta vera, sitztv arma þina lagdir itrþvegna vm þinn broþvrbana.»
18 4	Iþvnn qvaþ: «Loca ec qveþca lastasta/fom Egis ha/llo í; Braga ec kyrri biórreifan; vilcat ec, at iþ reiðir vegiz.»
19 4	Gefion qvaþ: «Hvi iþ esir tveir scoloþ inni her saryrþom sacaz? Loptci þat veit, at hann leikinn er oc hann fiorg avll fiá.»
20 4	Loci qvaþ: «Þegi þv, Gefion! þess mvn ec nv geta, er þic glapþi at geði sveinn inn hvíti, er þer sigli gaf oc þv lagdir ler yfir.»
21 4	Oþinn qvaþ: «Orr ertv, Loci! oc a/rviti, er þv for þer Gefion at gremi; þviat aldar orla/g hygg ec at hon a/ll vm viti iafngorla sem ec.»
22 4	Loci qvaþ: «Þegi þv, Oþinn! þv kvnnir aldregi deila vig meþ verom; opt þv gaft þeim, er þv gefa scyldira, enom slevorom sigr.»
23 4	Oþinn qvaþ: «Veiztv, ef ec gaf þeim, er ec gefa ne scylda, enom slevorom sigr: atta vetr vartv fyr iorþ neþan kýr mólcandi oc cona, oc hefir þv þar [born of] borit, oc hvgða ec þat args aþal.»
24 4	Loci qvaþ: «Enn þic síþa koþo Sámseyio í oc draptv a vétt sem va/lor; vitca líci fórtv verþioþ yfir, oc hvgða ec þat args aþal.»
25 4	Frigg qvaþ: «Avrla/gom ycrom scylit aldregi segia seggiom fra, hvat iþ esir tveir drygdvt i ardaga; firriz e forn ra/c firar!»
26 4	Loci qvaþ: «Þegi þv, Frigg! þv ert Fiorgyns mer oc hefir e vergiorn veriþ, er þa Vea oc Vilia leztv þer, Viþris qven! bada i badm vm tekit.»
27 4	Frigg qvaþ: «Veiztv, ef ec inni ettac Egis ha/llom i Baldri lican bvr: vt þv ne qvomir fra asa sonom, oc veri þa at þer reiþom vegit.»
28 4	Loci qvaþ: «Enn vill þv, Frigg! at ec fleiri telia mina meinstafi: ec þvi red, er þv riþa serat siþan Baldr at sa/lom.»
29 4	Freyia qvaþ: «Orr ertv, Loci! er þv ydra telr liota leiþstafi; orla/g Frigg hygg ec at a/ll viti, þott hon sialfgi segi.»
30 4	Loci qvaþ: «Þegi þv, Freyia! þic cann ec fvllgerva, era þer vamma vant: asa oc alfa, er her inni ero, hverr hefir þinn hór veriþ.»
31 4	Freyia qvaþ: «Flá er þer tvnga, hygg ec at þer fremr myni ogott vm gala; reiþir ’ro þer esir oc asynior; hryggr mvntv heim fara.»
32 4	Loci qvaþ: «Þegi þv, Freyia! þv ert fordoþa oc meíni blandin mioc, sitz þic at broþr þinom stóþo bliþ regin, oc mvndir þv þa, Freyia! frata.»
33 4	Niorþr qvaþ: «Þat er válitit, þótt ser varþer vers fái hóss eþa hvars; hitt er vndr, er áss ragr er her inn of kominn, oc hefir sa born of borit.»
34 4	Loci qvaþ: «Þegi þv, Niorþr! þv vart a/str heþan gisl vm sendr at goðom; Hymis meyiar ha/fðo þic at hlandtrogi oc þer i mvnn migo.»
35 4	Niorþr qvaþ: «Sv eromc licn, er ec varc langt heþan gisl vm sendr at goþom: þa ec ma/g gat, þann er mangi fiár, oc þiccir sa asa iadarr.»
36 4	Loci qvaþ: «Hettv nv, Niorþr! hafþv a hófi þic, mvnca ec þvi leyna lengr: við systor þinni gaztv slican ma/g, oc era þo vóno verr.»
37 4	Tyr qvaþ: «Freyr er beztr allra ballriþa asa gordom í; mey hann ne gretir ne mannz kono, oc leysir or ha/ptom hvern.»
38 4	Loci qvaþ: «Þegi þv, Tyr! þv kvnnir aldregi bera tilt meþ tveim; handar ennar hogri mvn ec hinnar geta, er þer sleít Fenrir fra.»
39 4	Tyr qvaþ: «Handar em ec vanr, enn þv hroþrs-vitniss, ba/l er beggia þrá; vlfgi hefir oc vel, er i bondom scal bíþa ragnara/crs.»
40 4	Loci qvaþ: «Þegi þv, Týr! þat varþ þinni cono, at hon atti ma/g viþ mer; a/ln ne penning hafþir þv þess aldregi vanréttiss, vesall!»
41 4	Freyr qvaþ: «Vlf se ec liggia arósi fyr, vnz rivfaz regin; þvi mvndv nest, nema þv nv þegir, bvndinn, ba/lvasmiþr!»
42 4	Loci qvaþ: «Gvlli keypta leztv Gymis dottvr oc seldir þitt sva sverþ; enn er Mvspellz synir ríða Myrcviþ yfir, veizta þv þa, vesall! hve þv vegr.»
43 4	Byggvir qvaþ: «Veiztv, ef ec øþli ettac sem Ingvnar-Freyr oc sva selict setr, mergi smera ma/lþa ec þa meíncráco oc lemþa alla i liþo.»
44 4	Loci qvaþ: «Hvat er þat iþ litla, er ec þat la/ggra sec oc snapvist snapir; at eyrom Freys mvnðv e vera oc vnd kvernom klaca.»
45 4	Beyggvir qvaþ: «Beyggvir ec heíti, enn mic braþan qveþa goð a/ll oc gvmar: þvi em ec her hroðvgr, at drecca Hroptz megir allir a/l saman.»
46 4	Loci qvaþ: «Þegi þv, Byggvir! þv kvnnir aldregi deila meþ monnom mat; oc þic i fletz strá finna ne mattv, þa er vago verar.»
47 4	Heimdallr qvaþ: «Avlr ertv, Loci! sva at þv ert orviti, hvi ne lezcaþv, Loci? þviat ofdryccia veldr alda hveim, er sina melgi ne manaþ.»
48 4	Loci qvaþ: «Þegi þv, Heimdallr! þer var i árdaga iþ lióta lif vm lagit; a/rgo baci þv mvnt e vera oc vaca vorþr goða.»
49 4	Scaþi qvaþ: «Lett er þer, Loci! mvnattv lengi sva leica la/som hala; þviat þic a hiorvi scolo ins hrimcalda magar gornom binda goð.»
50 4	Loci qvaþ: «Veiztv, ef mic a hiorvi scolo ens hrímcalda magar gornom binda goð: fyrstr oc ofstr var ec at fiorlagi, þars ver a Þiaza þrifom.»
51 4	Scaþi qvaþ: «Veiztv, ef fyrstr oc ofstr vartv at fiorlagi, þa er ér a Þiaza þrifvð: fra minom veom oc va/ngom scolo þer e ka/ld ráþ coma.»
52 4	Loci qvaþ: «Léttari í malom vartv viþ La/feyiar son, þa er þv letz mer a beð þinn boþit; getiþ verþr oss slics, ef ver gorva scolom telia vommin vár.»
Þa gecc Sif fram oc byrladi Loca i hrimcalci mioþ oc melti:
53 4	«Heill ver þv nv, Loci! oc tac viþ hrímcalci fvllom forns miaðar! heldr þv hana eina latir meþ asa sonom vammala/som vera.»
Hann toc viþ horni oc dracc af:
54 4	«Eín þv verir, ef þv sva verir, va/r oc gra/m at veri; einn ec veít, sva at ec uita þicciomc, hór oc af Hlorriða, oc var þat sa inn levisi Loci.»
55 4	Beyla qvaþ: «Fioll a/ll scialfa, hygg ec a for vera heiman Hlorriþa; hann reþr ró þeim er rogir her goð a/ll oc gvma.»
56 4	Loci qvaþ: «Þegi þv, Beyla! þv ert Byggviss qven oc meini blandin mioc; okynian meira coma meþ asa sonom, a/ll ertv, deigia! dritin.»
57 4	Þa com Þorr at oc qvaþ: «Þegi þv, ra/g vettr! þer scal minn þrvðhamarr Miollnir mal fyr nema; herþaklett drep ec þer halsi af, oc verþr þa þino fiorvi vm farit.»
58 4	Loci qvaþ: «Iarðar bvrr er her nv inn kominn, hvi þrasir þv sva, Þorr? enn þa þorir þv ecci, er þv scalt viþ vlfinn vega, oc svelgr hann allan Sigfa/ðvr.»
59 4	Þorr qvaþ: «Þegi þv, ra/g vettr! þer scal minn þrvðhamarr Miollnir mal fyr nema; vpp ec þer verp oc a a/strvega, siþan þic mangi sér.»
60 4	Loci qvaþ: «Avstrforvm þinom scaltv aldregi segia seggiom fra, sizt i hansca þvmlvngi hnvcþir þv, einheri! oc þóttisca þv þa Þorr vera.»
61 4	Þorr qvaþ: «Þegi þv, ra/g vettr! þer scal minn þrvðhamarr Miollnir mal fyr nema; hendi inni hogri drep ec þic Hrvngnis bana, sva at þer brotnar beina hvat.»
62 4	Loci qvaþ: «Lifa etla ec mer langan aldr, þottv hetir hamri mer; scarpar alar þottv þer Scrymiss vera, oc mattira þv þa nesti na oc svaltz þv þa hvngri heill.»
63 4	Þorr qvaþ: «Þegi þv, ra/g vettr! þer scal minn þrvðhamarr Miollnir mal fyr nema; Hrvngnis bani mun þer i hel coma fyr nagrindr neþan.»
64 4	Loci qvaþ: «Kvað ec fyr asom, qvaþ ec fyr asa sonom þaz mic hvatti hvgr; enn fyr þer einom mvn ec vt ganga, þviat ec veit, at þv vegr.
65 4	Avl gorðir þv, Egir! enn þv aldri mvnt siþan svmbl vm gora; eiga þín a/ll, er her inni er, leici yfir logi, oc brenni þer a baki!»
Enn eptir þetta falz Loci i Fránangrs forsi i lax liki, þar toco esir hann. Hann var bvndinn meþ þa/rmom sonar sins † Nara; enn Narfi sonr hans varþ at vargi. Scaþi toc eitrorm oc festi vp yfir annlit Loca; dra/p þar or eitr. Sigyn kona Loca sat þar oc helt mvnnla/g vndir eitriþ. Enn er mvnnla/gin var fvll, bar hon vt eitriþ. Enn meþan dra/p eitriþ a Loca. Þa kiptiz hann sva hart viþ, at þaðan af scalf iorþ a/ll: þat ero nv callaþir landscialptar.