Sigurðardrápa.
Kormákr Ögmundarson.

1.
Heyri sonr á, Sýrar,
sannreynis, fentenna,
örr, greppa læt ek uppi
jastrín, Haralds, mína.

2.
Meiðr er mörgum œðri
morðteins í dyn fleina;
hjörr fær hildibörrum
hjarls Sigurði jarli.

3.
Eykr með ennidúki
jarðhljótr día fjarðar
breyti, hún sá er, beinan,
bindr, seið Yggr til Rindar.

4.
Svall, þá er gekk með gjallan
Gauts eld, hinn er styr beldi,
glaðfœðandi Gríðar,
Gunnr; komsk Urðr ór brunni.

5.
Hróðr geri ek of mög mæran
meir Hákonar fleira;
haptsœnis geld ek hánum
heið; sitr Þórr í reiðu.

6.
Hafit maðr ask né eskis
afspring með sér þingat
fésæranda at fœra
fats; véltu goð Þjatsa;
hver myni vés við valdi
vægi kind of bægjask;
því fúr-Rögnir fagnar
fens; vá Gramr til menja.

7.
Algildan bið ek aldar
allvald of mér halda
ýs bifvangi Yngva
ungr; fór Hroptr með Gungni.