Höfuðlausn.
Egill Skalla-Grímsson

Vestr fór ek of ver,
en ek Viðris ber
munstrandar mar.
Svá er mitt of far.
Drók eik á flot
við ísa brot.
Hlóð ek mærðar hlut
míns knarrar skut.

Buðumk hilmir löð.
Þar ák hróðrar kvöð.
Berk Óðins mjöð
á Engla bjöð.
Lofat vísa vann.
Víst mærik þann.
Hljóðs biðjum hann,
því at hróðr of fann.

Hygg, vísi, at,
vel sómir þat,
hvé ek þylja fet,
ef ek þögn of get.
Flestr maðr of frá,
hvat fylkir vá,
en Viðrir sá,
hvar valr of lá.

Óx hjörva glöm
við hlífar þröm.
Guðr óx of gram.
Gramr sótti fram.
Þar heyrðisk þá,
þaut mækis á,
malmhríðar spá.
Sú var mest of lá.

Var-at villr staðar
vefr darraðar
of grams glaðar
geirvangs raðar.
Þar er í blóði
enn brimlá-móði
völlr of þrumði,
und véum glumði.

Hné folk á fit
við fleina hnit.
Orðstír of gat
Eiríkr at þat.

Fremr mun ek segja,
ef firar þegja.
Frágum fleira
til frama þeira.
Óxu undir
við jöfurs fundi.
Brustu brandar
við bláar randar.

Hlam heinsöðul
við hjaldrröðul.
Beit bengrefill,
þat var blóðrefill.
Frá ek, at felli
fyr fetilsvelli
Óðins eiki
í járnleiki.

Þar var eggja at
ok odda gnat.
Orðstír of gat
Eiríkr at þat.

Rauð hilmir hjör.
Þar var hrafna gjör.
Fleinn hitti fjör.
Flugu dreyrug spjör.
Ól flagðs gota
fjárbjóðr Skota.
Trað nift Nara
náttverð ara.

Flugu hjaldrs tranar
á hræs lanar.
Órut blóðs vanar
benmás granar.
Sleit und freki,
en oddbreki
gnúði hrafni
á höfuðstafni.

Kom gríðar læ
at Gjalpar skæ.
Bauð ulfum hræ
Eiríkr of sæ.

Lætr snót saka
sverð-Frey vaka,
en skers Haka
skíðgarð braka.
Brustu broddar,
en bitu oddar.
Báru hörvar
af bogum örvar.

Beit fleinn floginn.
Þá var friðr loginn.
Var almr dreginn.
Varð ulfr feginn.
Stózk foklhagi
við fjörlagi.
Gall ýbogi
att eggtogi.

Jöfurr sveigði ý,
flugu unda bý.
Bauð ulfum hræ
Eiríkr of sæ.

Enn mun ek vilja
fyr verum skilja
skapleik skata.
Skal mærð hvata.
Verpr ábröndum,
en jöfurr löndum
heldr hornklofi.
Hann er næstr lofi.

Brýtr bógvita
bjóðr hrammþvita.
Muna hodd-dofa
hringbrjótr lofa.
Mjök er hánum föl
haukstrandar möl.
Glaðar flotna fjöl
við Fróða mjöl.

Verpr broddfleti
af baugseti
hjörleiks hvati.
Hann er baugskati.
Þróask hér sem hvar,
hugat mælik þar,
frétt er austr of mar,
Eiríks of far.

Jöfurr hyggi at,
hvé ek yrkja fat.
Gótt þykkjumk þat,
er ek þögn of gat.
Hrærðak munni
af munar grunni
Óðins ægi
of jöru fægi.

Bar ek þengils lof
á þagnar rof.
Kann ek mála mjöt
of manna sjöt.
Ór hlátra ham
hróðr bar ek fyr gram.
Svá fór þat fram,
at flestr of nam.